Olion
Sefydliad Arweiniol:
Frân Wen
Ardal:
Bangor
Blaenoriaeth Buddsoddi:
Cymuned a Lle
Lluosi
Buddsoddiad: £356,252
Beth yw’r cefndir?
Cwmni theatr i blant a phobl ifanc ydi Frân Wen gyda’u cartref yn y Nyth, Bangor. Roedd y cwmni wedi bod yn cynnal prosiect ‘Nabod’ gyda phobl ifanc GISDA ers tro, a datblygodd stori a chymeriadau wedi eu hysbrydoli gan thema chwedl Arianrhod. Dyna ddechreuad Olion, gyda’r weledigaeth o gynnig rhywbeth gwahanol i artistiaid a’r gynulleidfa.
Y nod oedd creu cyfleoedd a darparu lle diogel i blant a phobl ifanc ddod o hyd i’w llais ac i ddylanwadu ar gynhyrchiad a fydd yn adlewyrchu’r heriau y maent wedi’u hwynebu yn tyfu i fyny.
Beth oedd y cymorth?
Bu rhaglen o ymgysylltu a gweithgareddau gyda grwpiau gwahanol o gymuned Bangor dros 18mis gan gyflwyno pobl o bob oed a chefndiroedd i’r celfyddydau. Cafodd cast cymunedol brofiad o weithio gydag artistiaid profiadol ar gynhyrchiad proffesiynol.
Bu perfformiad byw a digidol o gwmpas dinas Bangor o gynhyrchiad tair rhan oedd yn torri tir newydd, ac yn rhoi profiad rhyngweithiol i‘r gynulleidfa. Roedd sioe theatr yn Pontio, theatr ar leoliadau ym Mangor, a gŵyl gymunedol awyr agored gyda cherddoriaeth fyw, bwyd a dawnsio. Ffilm fer oedd yn cloi, gan gyfuno deunydd o rhan un a dau.
Cafodd criw Cwmni Serol, sef prosiect theatr i bobl ifanc gydag anghenion ychwanegol, gyfle i ymuno yn y cynhyrchiad. Mae’r criw yn cyfarfod yn wythnosol i ddatblygu eu sgiliau perfformio, a chafwyd cefnogaeth yn benodol gan y gronfa i ddatblygu eu sgiliau rhifedd drwy weithgareddau creadigol.
Pa wahaniaeth mae hyn wedi ei wneud?
Ymgysylltwyd yn greadigol gyda bron i 4000 o bobl yn ystod y rhaglen. Roedd rhain yn pontio sawl cymuned wahanol o bobl o’r ardal, gyda nifer helaeth ohonynt yn cymryd rhan mewn gweithgaredd theatrig a pherfformiad byw am y tro cyntaf. Roedd llawer yn dweud eu bod wedi mwynhau bod yn rhan o brofiad cymunedol a chymdeithasol, ac o’r herwydd yn llai unig.
Yn ogystal â’r cast cymunedol, cafodd 14 o bobl ifanc brofiad gwaith, a gwirfoddolodd 42 o bobl ar y cynhyrchiad.
Daeth dros 3000 o ymwelwyr i’r digwyddiad byw, ac fe elwodd busnesau lleol o’r bwrlwm yn ystod yr ymarferion a’r ŵyl gymunedol.
Mae rhoi pobl ifanc wrth galon pob cynhyrchiad yn greadigol yn greiddiol i’n gweledigaeth ni yn Fran Wen. Trwy weithio efo GISDA, roedd Olion wedi sicrhau ein bod ni yn gallu gwneud hyn tra’n caniatáu i ni ddod â chynhyrchiad proffesiynol o’r safon uchaf i Fangor.
Gethin Evans
Cyfarwyddwr Artistig Frân Wen
Mae hwn wedi bod yn brofiad mor werthfawr i grŵp o bobl ifanc sy’n aml yn teimlo eu bod wedi’u heithrio. Mae gweld eu hyder yn tyfu ar yr un pryd â gweld y cynhyrchiad hwn yn dod yn fyw wedi bod yn ysbrydoledig. Mae hefyd wedi rhoi cipolwg iddynt ar rai o’r cyfleoedd o ran gwaith a gyrfa yn y theatr a’r celfyddydau.
Sian Elen Tomos,
Prif Weithredwr GISDA
