Mentergarwch
Gwynedd a Môn
Sefydliad Arweiniol:
Menter Môn
Ardal:
Gwynedd gyfan
Blaenoriaeth Buddsoddi:
Cefnogi Busnes Lleol
Beth yw’r cefndir?
Mae’r Hwb Menter yn cefnogi entrepreneuriaid lleol a busnesau bach i ddatblygu eu syniadau i greu busnes llwyddiannus mewn dull ymarferol a phersonol.
Beth oedd y cymorth?
Roedd pecyn cymorth yr Hwb Menter yn cynnwys cyngor busnes 1 i 1, cymorth ariannol, rhaglen o weithgareddau i rannu gwybodaeth a phrofiad busnes, mynediad at adnoddau a gofodau cydweithio, a digwyddiadau rhwydweithio i fusnesau.
Pa wahaniaeth mae hyn wedi ei wneud?
Yn ystod y cynllun Mentergarwch Gwynedd a Môn yn 2023-25 cafodd 144 o fusnesau Gwynedd gymorth, a arweiniodd ymlaen i 50 menter newydd a 64 o swyddi wedi eu creu.
Dyma hanesion rhai o’r busnesau sydd wedi elwa o gymorth yr Hwb Menter:
Astudiaeth achos busnes:
Cymro Vintage
Beth yw’r cefndir?
Mae Cymro Vintage yn fusnes sy’n arbenigo mewn gwerthu dillad vintage unigryw o ansawdd uchel. Roedd y cwmni wedi bod yn gwerthu ar-lein, ac ar ôl cynnal siop ‘pop-yp’ llwyddiannus, yn gweld cyfle i dyfu’r busnes.
Beth oedd y cymorth?
Derbyniodd y cwmni gymorth ymarferol gan yr Hwb Menter – rhaglen 8 wythnos o gyngor busnes a hyfforddiant. Roedd sesiynau ar gyfrifo, marchnata a chynllunio busnes yn rhan o’r hyfforddiant.
Fe gafodd cymorth ariannol ei roi hefyd, ac aeth hwn tuag at gostau sefydlu siop i werthu dillad vintage ar un o strydoedd prysuraf Caernarfon.
Pa wahaniaeth mae cymorth yr Hwb Menter wedi ei wneud?
Mae’r pecyn cymorth wedi golygu bod arian i dalu rhai o gostau cychwynnol rhedeg y siop, ac mae’r hyfforddiant a’r cyngor wedi rhoi sgiliau rhedeg busnes gwerthfawr i’r perchennog. Bydd hyn yn ei dro yn gwneud y busnes yn fwy cynaliadwy, ac yn rhoi’r cyfle gorau posibl o lwyddiant yn y dyfodol.
Mae ymateb pobl wedi bod yn gadarnhaol iawn i agoriad y siop. Mi wnaeth y rhaglen roi cic i mi feddwl y byddwn i’n gallu gwneud mwy gyda’r busnes. Roedd y cyrsiau ariannol a marchnata wedi helpu gyda’r pryderon am yr ochr yna o’r busnes. Dydi o dal heb suddo i mewn bod ‘da fi siop fy hun – mae wir yn freuddwyd wedi dod yn wir!
Dylan Jones, Cymro Vintage
Astudiaeth achos busnes:
Arfon Timber Frames
Beth yw’r cefndir?
Mae Arfon Timber Frames yn gwmni sy’n arbenigo mewn adeiladau ffrâm bren perfformiad uchel gan ddefnyddio pren lleol yn bennaf. Wedi’i sefydlu ddiwedd 2023, mae’r cwmni wedi tyfu’n gyflym a bellach yn cyflogi saith o bobl, gyda dros eu hanner yn ferched. Mae chwech yn ymwneud â’r ochr gweithgynhyrchu ac adeiladu, a pherson arall yn rheoli’r rhaglen yn y swyddfa.
Beth oedd y cymorth?
Defnyddiodd y cwmni gymorth ariannol cychwynnol gan yr Hwb Menter i gael aelodaeth â chyrff masnach proffesiynol pwysig i’w diwydiant ac i gael achrediad i’w gwaith, sy’n dilysu ymrwymiad y cwmni i arferion adeiladu cynaliadwy o ansawdd uchel.
Pa wahaniaeth mae cymorth yr Hwb Menter wedi ei wneud?
Mae ymuno â chyrff proffesiynol, yn enwedig y Structural Timber Association, yn rhoi sicrwydd i gwsmeriaid eu bod yn derbyn gwaith o safon uchel. Mae’r cwmni wedi gallu cyrraedd safonau uchaf y diwydiant ar gyfer ffrâm bren strwythurol sef ISO 9001, a’r STA Assure Gold.
Mae’r busnes wedi tyfu’n sylweddol ac rydyn ni wedi cael llawer o ymholiadau eleni oherwydd yr hysbysebu rydyn ni’n ei wneud ynglŷn â’r math hwn o waith. Ni fyddai’r cwmni wedi gallu anelu am y mathau hyn o achrediadau yn eu blwyddyn gyntaf o fasnachu heb gefnogaeth Hwb Menter, Busnes Cymru a Chyngor Gwynedd.
Mark Chapman
Prif Saer Coed a Rheolwr Gyfarwyddwr
Astudiaeth achos busnes:
Carwyn Ap
Plymio a Gwresogi
Crefftwr o Nefyn yn elwa o gymorth Hwb Menter
Beth yw’r cefndir?
Mae’r busnes Carwyn Ap Plymio a Gwresogi, sydd wedi ei leoli yn Nefyn, yn darparu amrywiaeth o wasanaethau plymio, gan arbenigo mewn ystafelloedd ‘molchi a gwresogi gyda boileri nwy. Roedd Carwyn eisiau ehangu i osod gwahanol systemau gwresogi yn y dyfodol, ac yn benodol i osod pympiau gwres ffynhonnell aer.
Beth oedd y cymorth?
Fe gafodd y busnes gyngor i helpu i ddatblygu drwy greu cynllun busnes ac ennill grant tuag at offer. Cafodd gymorth i gynllunio sut i wario’r arian gan benderfynu ar elfennau ymarferol fel yswiriant i ddechrau’r busnes a rhywfaint o offer ‘analyser’ nwy. Hefyd fe wnaeth yr Hwb Menter helpu gydag elfennau hyrwyddo – creu logo ar gyfer y fan a dillad i’w gwmni.
Pa wahaniaeth mae cymorth yr Hwb Menter wedi ei wneud?
Gyda’r busnes yn mynd o nerth i nerth, ei nod nesaf ydy symud tuag at arbenigo mewn ffyrdd mwy cynaliadwy o wresogi, megis technoleg sy’n defnyddio gwres o’r aer.
Mi ges i gymorth i greu cynllun busnes wnaeth i fy helpu i benderfynu pa wahanol agweddau i fuddsoddi ynddyn nhw.
Mae’r busnes wedi tyfu’n dda iawn. Dwi’n cael mwy a mwy o waith o ran bathrwms yn benodol, a lot o waith gosod bwyleri nwy hefyd.
Carwyn ap Myrddin
Astudiaeth achos busnes:
Tylwyth
Beth yw’r cefndir?
Ymgynghorydd treftadaeth ddiwylliannol ydy Jessica John o Ddolgellau, ac mae’n cynnig amrywiaeth eang o wasanaethau – o gynllunio arddangosfeydd i gefnogi grwpiau cymunedol gyda chynllunio treftadaeth.
Mae’r math o waith ymgynghori mae hi’n ei wneud fel arfer yn cael ei gwblhau o fewn sefydliadau. Ond mae Jessica yn gwybod nad yw’n hawdd dod o hyd i rywun sy’n gallu gwneud ychydig o bob dim o fewn sefydliad neu gymuned, a dyna ble y gall hi helpu.
Beth oedd y cymorth?
Cafodd Jess gymorth i ysgrifennu cynllun busnes, a grant oedd yn allweddol i sefydlu ei busnes.
Diolch i’r grant a gefais yn y lle cyntaf dwi wedi gallu sefydlu gwefan a mynychu cyrsiau. Er fy mod i wedi rheoli prosiectau o’r blaen doeddwn i heb wneud cwrs swyddogol ar reoli prosiectau, ac mae pethau fel hyn wedi bod o help mawr wrth gychwyn busnes.
Mae’n braf rhedeg eich busnes eich hun, yndi!
Jessica John Tylwyth