Beth yw’r ​cefndir?​​

Roedd busnesau Garej Penrhos, Siop Dyfi a’r Swyddfa Bost yn Aberdyfi mewn perygl o gau wrth i’r eiddo oedd yn cynnwys garej, gweithdy, siop a fflat tair llofft fynd ar werth. ​
Ffurfiwyd y cwmni nid-er-elw Prosiectau Cymunedol Aberdyfi Cyf i arbed y busnesau a’r swyddi lleol drwy brynu’r eiddo i’r gymuned.​

Beth oedd y cymorth?​

Bu cyfnod ansicr iawn yn ystod y broses prynu yn dilyn tirlithriad ar ffiniau’r eiddo, oedd yn golygu anhawster i gael yswiriant nes oedd gwaith atgyweirio wedi ei wneud. ​

Ond yn dilyn sefydlogi’r safle a buddsoddiad gan y Gronfa, llwyddwyd i brynu’r eiddo.​

Pa wahaniaeth mae hyn wedi ei wneud?

Mae’r pryniant wedi gwarchod wyth swydd yn y gymuned leol drwy ddiogelu’r busnesau ar y safle. Mae cadw’r adeilad yn eiddo i’r gymuned hefyd wedi golygu bod tŷ fforddiadwy ar gael i’w rentu gan bobl leol, ac mae cyfle i ddatblygu’r gweithdy enfawr yn ddwy uned newydd i fusnesau lleol.​

Agorodd Taid y garej gyntaf fan hyn yn 1922, ond yn ddiweddar daeth yr adeilad ar werth. Yr unig gynigion oedd cael gwared â’r hen adeiladau a datblygu tai marchnad agored yma. Mae’n debyg mai ail gartrefi fyddai nhw wedi bod, a doeddwn i ddim eisiau gweld rhywbeth fel hynny’n digwydd. Ryda ni wedi gallu gwarchod wyth swydd, achub y siop, y swyddfa bost a’r garej.

Catrin O’Neill, ​
Cyfarwyddwr Prosiectau Cymunedol Aberdyfi Cyf.