Beth yw’r ​cefndir?​​

Mae Cymdeithas Eryri yn elusen sy’n gwneud gwaith cadwraeth ymarferol ar draws Eryri. Mae’r Gymdeithas yn cynnal rhaglen eang o ddigwyddiadau gwirfoddoli – Dwylo Diwyd – sy’n gwarchod mannau hardd a bywyd gwyllt gwerthfawr y Parc Cenedlaethol.

Roedd y cynllun Caru Eryri yn bartneriaeth rhwng Cymdeithas Eryri a phum sefydliad – Cyngor Gwynedd, yr Ymddiriedolaeth Genedlaethol, Awdurdod Parc Cenedlaethol Eryri, Cyfoeth Naturiol Cymru a’r Bartneriaeth Awyr Agored. Un o’r amcanion oedd ceisio rheoli effaith y nifer cynyddol o ymwelwyr â’r parc cenedlaethol.

Beth oedd y cymorth?​

Cafodd cynllun cadwraeth ei greu oedd yn cynnwys gwaith hanfodol cynnal a chadw llwybrau, casglu sbwriel ar yr Wyddfa a lleoliadau cyfagos, rheoli rhywogaethau o blanhigion ymledol, a rheoli pob math o gynefinoedd er budd bywyd gwyllt.

Cafodd dau hyfforddai ifanc eu cyflogi, a sesiynau hyfforddiant eu cynnal i annog ac ysbrydoli gwirfoddolwyr.  Bu dros 70 o ddyddiau gwaith a digwyddiadau i wirfoddolwyr, gan greu cyfanswm o 1,152 o gyfleoedd gwirfoddoli yn ystod y rhaglen.

Pa wahaniaeth mae hyn wedi ei wneud?

Mae’r cynllun wedi gwneud gwahaniaeth gwirioneddol, ac wedi helpu i fynd i’r afael â materion cadwraeth ar draws Eryri.  Hefyd bu cydweithio rhwng ystod eang o bartneriaid allweddol i warchod mannau arbennig yn yr ardal.

Llwyddodd y tîm o staff, partneriaid a gwirfoddolwyr i gasglu dros 1000kg o sbwriel, ac i wneud gwaith cynnal a chadw ar 28km o lwybrau troed.