Beicio i Bawb
Sefydliad Arweiniol:
Antur Waunfawr
Ardal:
Caernarfon ac ysgolion Gwynedd
Blaenoriaeth Buddsoddi:
Cymuned a Lle
Buddsoddiad: £281,189
Beth yw’r cefndir?
Mae Beics Antur yn un o fusnesau gwyrdd Antur Waunfawr, wedi’i leoli ym Mhorth yr Aur yng nghanol tref Caernarfon. Sefydlwyd y busnes fel rhan o genhadaeth Antur Waunfawr i gynnig cyfleoedd iechyd a llesiant i’r gymuned. Yn ogystal â llogi, adnewyddu a gwerthu beiciau, mae’r ganolfan yn darparu gwasanaeth trwsio, gan annog pobl i feicio yn hyderus ac yn ddiogel.
Er mwyn ehangu’r cynnig, datblygwyd y prosiect Beicio i Bawb. Nod y prosiect oedd cyflwyno sesiynau hyfforddi a gweithgareddau beicio ar draws ardal Gwynedd er mwyn:
- gwella sgiliau beicio a magu hyder ymhlith beicwyr newydd ac
- annog pobl o bob oed i gymryd rhan mewn beicio fel gweithgaredd cymdeithasol
Roedd angen ychwanegu beiciau arbenigol wedi’u haddasu i fflyd Beics Antur er mwyn ehangu mynediad i bobl gydag anableddau dysgu, ac i’r gymuned yn ehangach.
Beth oedd y cymorth?
Drwy’r cynllun Beicio i Bawb cafodd dau feic arbenigol newydd eu prynu.
Trefnwyd amrywiaeth o sesiynau hyfforddi a gweithgareddau beicio ar draws ardal Gwynedd er mwyn gwella sgiliau, magu hyder ac annog pawb i feicio. Roedd rhain yn cynnwys gwersi sgiliau mewn ysgolion, sesiynau beicio i unigolion ag anableddau, a sesiynau ar gyfer grwpiau cymunedol na fyddai wedi cael mynediad i feicio fel arall.
Pa wahaniaeth mae hyn wedi ei wneud?
- Cafodd dwy swydd eu creu a thair eu diogelu, ac mae tri aelod o staff wedi cael cymwysterau i roi hyfforddiant sgiliau beicio.
- Mae dros 450 o sesiynau beicio wedi’u cynnal a 900 o blant ac oedolion wedi cymryd rhan.
- Roedd yr holl blant oedd wedi cael gwersi sgiliau yn yr ysgol yn teimlo’n fwy diogel ac yn hyderus i feicio ar ôl y sesiynau.
- Mae mynediad i feicio yn llawer gwell ac yn ymarferol i feicwyr amhrofiadol sydd heb feic.
Da ni wedi cael beics newydd a chynyddu’r tîm, sydd wedi golygu ein bod ni wedi gallu gwneud mwy o bethau. ‘Da ni wedi mynychu ysgolion, rhedeg sesiynau hefo grwpiau cymunedol, a beicio dan do pan mae’r tywydd yn wael yn y gaeaf, yn ogystal â rhedeg y siop.
Mae’n wych gweld mwy o bobl yn gallu mwynhau rhyddid ar ddwy olwyn!”
Tom Workman
Rheolwr Siop, Beics Antur
Mae’r sesiynau yma wedi rhoi cyfle i’r disgyblion ddatblygu sgiliau amrywiol beicio, yn ogystal a rhoi cyfle wythnosol i ymarfer corff – sydd wrth gwrs yn gwella iechyd a lles y disgyblion. Mae’r sesiynau hefyd yn rhoi anogaeth a chyfle i’r disgyblion weithio tuag at rywbeth arbennig – sydd wedi ein cynorthwyo hefo ymddygiad rhai disgyblion. Mae hyder cymdeithasu’r disgyblion wedi gwella, yn ogystal â gallu rhai i gael mynediad at wasanaethau yn y gymuned.
Staff Ysgol Pendalar, Caernarfon
