Academi Adra
Sefydliad Arweiniol:
Adra
Ardal:
Gwynedd gyfan
Blaenoriaeth Buddsoddi:
Pobl a Sgiliau
Beth yw’r cefndir?
Mae cymdeithas dai Adra yn un o sefydliadau a chyflogwyr mwyaf Gwynedd, ac ers ei sefydlu mae wedi rhoi pwyslais ar ddatblygu sgiliau yn lleol. Sefydlwyd Academi Adra yn 2021 i gefnogi pobl ddi-waith a phobl ifanc i ddatblygu sgiliau.
Beth yw’r cymorth?
Mae Academi Adra yn darparu hyfforddiant i drigolion Gwynedd gan gynnig cyrsiau galwedigaethol fel adeiladwaith, sgiliau gweinyddol, gwasanaethau cwsmer, cefnogi pobl a chynnal tiroedd. Yn dilyn cwblhau cyrsiau hyfforddiant, mae cyfle i unigolion gael lleoliadau gwaith gyda thâl, unai gydag Adra ei hun neu gyda rhai o’i bartneriaid – contractwyr a sefydliadau lleol neu’n gymdeithasau tai eraill.
Pa wahaniaeth mae hyn wedi ei wneud?
Mae unigolion sydd wedi cymryd rhan yn y cynllun yn dysgu sgiliau bywyd, yn cael blas ar fyd gwaith ac yn magu hyder i fynd ymlaen i gyflogaeth. Mae amryw hefyd wedi mynd ymlaen i gael cynnig prentisiaeth neu swydd gyda chwmni lleol yn dilyn cyfnod o brofiad gwaith Academi Adra. Mae’r Academi hefyd wedi cynnal ymgyrch i annog merched ifanc i ystyried gyrfa yn y sector tai ac adeiladu.
Diolch i’r Gronfa Ffyniant Gyffredin, rydym wedi medru cynnig gymaint mwy o gyfleoedd hyfforddiant a chyflogaeth i drigolion Gwynedd. Rydym yn falch iawn o bawb sydd wedi cymryd rhan a’r hyn rydym wedi llwyddo i’w gyflawni.
Ceri Ellis Jackson, Arweinydd Rhaglen Academi Adra
Rhai o’r prif resymau i ni gychwyn Academi Adra oedd i ymateb i’r heriau lleol sy’n wynebu pobl – diweithdra a chyflogaeth dymhorol, yn ogystal â diffyg profiad, sgiliau a chefnogaeth. Mae Academi Adra yn cefnogi pobl a chymunedau i ffynnu drwy gynnig cyfle i ddysgu sgiliau newydd, i gael mynediad at swyddi ac i gael y profiad fydd yn eu helpu yn y dyfodol.
Elin Williams, Pennaeth Gwasanaethau Cymunedol Adra
Dyma hanesion rhai o’r bobl sydd wedi elwa o gymorth Academi Adra:
Astudiaeth achos: Sgiliau Gweinyddol
Beth yw’r cefndir?
Fe wnaeth Daniella Williams a Hanna Ross gofrestru ar gyfer cwrs Sgiliau Gweinyddol gydag Academi Adra, a chwblhau wythnos o hyfforddiant ac wythnos o brofiad gwaith yn swyddfa Adra. Yn dilyn cwblhau’r cwrs, bu’r ddwy’n llwyddiannus mewn cyfweliad i gael lle ar leoliad gwaith 16 wythnos gyda thâl mewn dwy adran wahanol yn Adra.
Pa wahaniaeth mae hyn wedi ei wneud?
Mae Daniella wedi ymuno gyda’r tîm yn Tŷ Gwyrddfai, Penygroes. Fel rhan o’r profiad ar leoliad bu Daniella yn cydlynu a chefnogi staff Adra i drefnu digwyddiadau, hyfforddiant a chyfarfodydd, a hefyd yn dderbynnydd yn croesawu ymwelwyr i’r ganolfan.
Mae gwaith Daniella wedi cyfrannu cymaint i’r busnes mewn amser byr iawn. Rydym yn trio cynnig amrywiaeth o fewn ei rhaglen waith a fydd o ddefnydd iddi yn y dyfodol.
Julie Stokes-Jones, Rheolwr Busnes Tŷ Gwyrddfai
Mae Hanna wedi ymuno gyda’r tîm Adnoddau Dynol sy’n cefnogi dros 350 o staff y cwmni.
Mae’r cwrs wedi rhoi cymaint o brofiadau gwahanol i mi yn barod, a dwi’n cael dysgu a defnyddio pob math o raglenni gweinyddol o fewn y tîm Adnoddau Dynol erbyn hyn. Dwi’n gobeithio y bydd y profiadau dwi’n eu cael yn y lleoliad gwaith yma yn fy ngwneud yn ymgeisydd cryfach ar gyfer swyddi yn y dyfodol. Dwi’n ddiolchgar iawn i Academi Adra am y profiad.
Astudiaeth achos: Adeiladwaith
Beth oedd y cymorth?
Cafodd Trystan, Dylan a Tomos le ar y cwrs Adeiladwaith sy’n un o’r cyrsiau mwyaf poblogaidd. Ar ôl cael wythnos o hyfforddiant ac wythnos o brofiad gwaith bu’r tri yn llwyddiannus yn eu cyfweliadau i gael lleoliad gwaith gyda thâl trwy Academi Adra.
Pa wahaniaeth mae hyn wedi ei wneud?
Gan fod gan Tomos gefndir mewn plastro roedd ei leoliad gwaith gyda thîm Trwsio Adra ar gynlluniau yn Trem yr Wyddfa, Penygroes. Mae Adra wedi ymrwymo i ddatblygu a buddsoddi yn eu stoc dai presennol i wella cyflwr eu cartrefi. Cafodd Tomos brofiad yn yr elfen yma o’r gwaith ac ar ddiwedd ei leoliad gwaith roedd wedi datblygu fel unigolyn, gyda sgiliau newydd fydd o fudd iddo wrth chwilio am waith neu fynd ymlaen i hyfforddiant pellach.
Roedd Dylan yn awyddus i gael profiad o wahanol grefftau, a threfnwyd rhaglen gydag amrywiaeth eang o grefftau a swyddi gwahanol gyda gweithlu Trwsio. Cafodd flas o wahanol agweddau o waith adeiladu oedd yn help iddo wrth feddwl am y cam nesaf yn ei yrfa.
Mae Trystan ar leoliad gwaith gyda thâl am 16 wythnos gyda Williams Homes. Mae Williams Homes yn cyd-weithio gydag Academi Adra fel partner, ac yn cynnig cyfleon unigryw i bobl ifanc lleol i gael dysgu am y dulliau adeiladu diweddaraf o fewn eu cymunedau.
Mae Trystan yn rhan o’r tîm sydd yn gweithio ar ddatblygiad 10 miliwn o bunnoedd i ddarparu 41 o gartrefi fforddiadwy i ClwydAlyn a Grŵp Cynefin ym Mhenrhyndeudraeth. Mae’r cartrefi yma yn hynod effeithlon o ran ynni, ac yn cael eu hadeiladau yn defnyddio technoleg gwyrdd.
Mae’n braf gweld dysgwyr Academi Adra yn mynd ymlaen i gael lleoliad gwaith gyda thâl ac yn darparu gwasanaeth amhrisiadwy o fewn ein cymunedau trwy fod yn rhan o’r broses o ddarparu tai fforddiadwy newydd i ClwydAlyn a Grŵp Cynefin.
Ceri Ellis-Jackson, Arweinydd Rhaglen Academi Adra
